用台語說性教育

420是性平教育日，佇25年前 ê 這工，屏東縣高樹鄉高樹村高樹國中三年學生葉永鋕，因為講話 ê 方式佮個性，佮其他查埔無相仝，煞去予同學欺負，毋敢下課時間去便所，伊上課時，提前離開教室去便所，無偌久就予人發現倒佇便所內底，死 ê 時陣才15歲。

因為這件代誌，政府佇2004年公布《性別平等教育法》，學校愛開始推廣性別平等教育。我看過葉媽媽講話 ê 影片，in厝內應該是講台語，所以這篇文章用台文來寫，感謝 牽囡仔ê手 行台語ê路 的朋友幫我改過。

我佮足濟學生、家長講過 #我ê身體我做主 這个主題，毋過今年頭擺用台語來分享，感謝台語路的邀請，予我會當佇 #性平不小室 用台語講這件重要的代誌。其實我欲予囡仔的觀念真簡單，就是「照顧家己、尊重別人」爾爾。

一開始，我先佮囡仔講：「這个世界上，上最寶貴 ê 人就是家己，認捌家己足重要。所以課程中，咱會做伙學習出世佮成長、性佮青春期，準備大漢。

了解家己足寶貴 ê 囡仔，才會知影，毋免「像查埔抑是像查某」，做真正 ê 家己上重要；尊重別人，嘛愛保持家己 ê 身體界線；這節性教育課，就是欲予in成做 #愛家己嘛尊重別人 ê人。

-

囡仔愛知影，每一个人出世，攏佮性器官足有關係，#性器官毋是啥物垃圾話，是身體重要 ê 部分。

查某有陰道（im-tō）、卵巢，卵巢內底的卵luán，10歲了後會開始成熟，成熟 ê 卵若是無拄著精子，就會走入去子宮，變作月經， ùi 陰道流出來。未來若是查某欲生囝，子宮就是紅嬰仔 ê 第一間厝，紅嬰仔可能ùi陰道生出來，嘛有可能是醫生拍開阿母 ê 腹肚，共紅嬰仔提出來。

精子是按怎來 ê？查埔放尿 ê 器官是lān-tsiáu，邊仔兩粒是 lān-hu̍t，嘛是差不多10歲、11歲時， lān-hu̍t會開始製造精子， lān-hu̍t 裝滿時，精子就會對lān-tsiáu出來。

毋管是陰道（im-tō）抑是 lān-tsiáu ，大人平常時攏講袂出嘴，定定講是「遐 (Hia)」，這幾年，大人較進步，改講「隱私部位」。毋過，干焦佮性有關 ê 身體部位才是「隱私」？「隱私部位」敢真正thái-ko、歹看、袂見笑bē-kiàn-siàu，所以咱衫愛穿予好，莫予人看著？

上奇怪 ê是，大人攏講：「隱私部位愛經過你 ê 同意，才會當看、會當摸。」敢講身體其他所在，就毋免問？

其實，你 ê 隱私部位有偌大偌細，由家己決定。毋管欲摸啥人、啥物原因共摸、按怎摸，＃攏愛先問，尊重對方，這就是「身體界線」，好好仔建立「身體界線」 ê 孩子，才袂凊彩破壞別人 ê 身體界線。

而且，每一个人 ê 身體感覺 lóng 無仝，閣會一直改變。只有人予你感覺怪怪、礙虐（gāi-gio̍h），就離伊較遠；若是有人無尊重你 ê 身體界線，就大聲講出來：「我足不爽快，停落來！」抑是離開現場，揣信任 ê 大人鬥相共。囡仔千萬愛會記，雖然咱有練習講出身體 ê 感覺，毋過彼个時陣講袂出話，嘛無毋著，是對方做毋著，本來就無任何人會當傷害你！

因為講「無愛」誠無簡單，有時陣會感覺歹勢，有時會煩惱，講出來敢若足無量⋯⋯NO！毋管是查埔查某，每一个人身體界線攏需要受著尊重，無論對方幾歲、性別、身分，攏袂當予你感覺無爽快！因為 ＃你是你身體 ê 主人，

嘛因為你愛你 ê 身體，你知影尊重別人 ê 重要，所以咱愛練習莫講台語性器官 ê 垃圾話，莫予人感覺台語是罵人 ê 語言，性器官是thái-ko的部分。有一寡人會講，伊只是「講耍笑」，無欲傷害別人，聽你黑白講！只要聽 ê 人無感覺好笑，就毋是「講耍笑」。講垃圾話是因為無尊重對方，咱毋免對這種人扮笑面，對方才會知影家己講毋著話。

最後，我想欲予查埔兩个這馬就會使去實現性別平等的建議：

1.放尿時共門關起來！袂予逐家聽著你放尿 ê 聲，看著你 ê 尻川，共你 ê 隱私揣轉來。

2.坐著放尿較清氣，廁所保持衛生，是對厝內人佮家己負責 ê 好習慣！

關於性別平等教育，我閣有真濟愛學習 ê 事，就親像我 ê 台語仝款，毋過我真認真學習，嘛希望愈來愈濟父母看重這兩件代誌，予每一个囡仔知影，in是咱 ê 寶貝，大漢 ê 過程，可能會發生足濟好 ê 、歹 ê 代誌，攏無要緊，只要相信家己 ê 直覺，講出家己 ê 感覺，愛護家己，尊重別人，in ê 身軀邊一定會有人支持！